“Reforma në drejtësi në vëmendjen më të lartë të Biznesit të Huaj në Shqipëri”
“Ne duam të qëndrojmë këtu dhe të vazhdojmë të investojmë më shumë. Por që kjo të jetë e mundur dhe që Shqipëria të tërheqjë investime të reja, ne kemi nevojë për një mjedis biznesi ku të mbizotërojë funksionimi i ligjit. Realizimi i reformave në sistemin gjyqësor shqiptar do të ndikojë në masë të madhe kushtet ekonomike në vitet që do të vijnë si dhe do të ndikojë konsiderueshëm në vendimet e sotme për investime”. Kjo është kërkesa që Shoqata e Investitorëve të Huaj në Shqipëri, FIAA ka artikuluar për autoritetet shqiptare nëpërmjet një deklarate të shpërndarë në media.
Duke shprehur domosdoshmërinë për reformën në drejtësi, me të cilën vec të tjerave krijohet një klimë e përshtashme për investime, FIAA deklaron se “Ne jemi të gjithë të vetëdijshëm se, çdo ditë, vonesa e realizimit te reformës i kushton Shqipërisë investime të reja, vende të reja pune, rritjen e eksporteve si dhe fillimin e negociatave drejt anëtarësimit në Bashkimin Europian”. Për investitorët e huaj që aktualisht operojnë në Shqipëri: “Kontrolli i korrupsionit dhe formalizimi i ekonomisë, funksionimi më i mirë i ligjit duke përfshirë respektimin e rregullave të arbitrazhit ndërkombëtar, si dhe stabiliteti politik, janë treguesit e një qeverisje të mirë dhe cilësie institucionale të këtij vendi”.
