Krahasuar me qershorin e vitit të kaluar, në 2017 përgjatë këtij muaji janë shënuar më shumë aksidente.
Sipas INSTAT në qershor 2017 rezultojnë 185 aksidente me një rritje 2.2 % krahasuar me qershor 2016.
Ndërsa sa i përket numrit të të aksidentuarve kemi ulje. Ky numër është ulur me 4.7% krahasuar me të njëjtën periudhë të një viti më parë.
Trendi i të aksidentuarve reflektohet edhe me atë të të vdekurve si pasojë e asksidenteve. Në qershor rezultojnë 12 persona që kanë humbur jetën nga aksidentet një shifër kjo 46.4% më e ulët se i njëjti muaj i një viti më parë.
Sipas INSTAT të rinjtë mbeten kontingjenti që ka kryer edhe numrin më të lartë të aksidenteve.
“Në Qershor, aksidentet rrugore, në 73,0 % të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve është kryer nga grup mosha 16 – 25 vjeç duke zënë 24,3 % të numrit të aksidenteve rrugore dhe duke u rritur me 66,7 %, krahasuar me një njëjtën periudhë të një viti më parë”, vlerëson INSTAT.
Po kështu në gjashtëmujorin e parë 2017, aksidentet rrugore të cilat kanë ndodhur si pasojë e sjelljes së drejtuesit të mjetit zënë 79,9 % të rasteve. Numri më i lartë i aksidenteve është kryer nga grup mosha 25 – 35 vjeç, duke zëne 28,3 % të numrit të aksidenteve rrugore dhe duke shënuar ulje 9,3 %, krahasuar me njëjtën periudhë të një viti më parë, raporton Monitor.
Në qershor 2017, numri të aksidentuarve për 100.000 banorë ishte afërsisht 8 persona. Krahasuar me mesataren e vitit 2016, ky numër u rrit me 5,8 %.
