Ndryshe nga sa ka deklaruar qeveria për bonuse dhe pagesë të orëve shtesë, mjekët në QSUT nuk kanë marrë as pagën bazë prej disa muajsh . Lajmin e ka bërë të ditur sot Shoqata e Infermierëve përmes një ankese publike, ku shkruan se kjo situatë vijon prej disa muajsh, ndërsa ata kanë frikë të flasin pasi mund t’i heqin nga puna. Në këtë ankesë theksohet se, infermierët nuk ankohen dot për pagat, pasi marrin vërejtje ose i lëvizin në spitale të tjera. Në rastet më ekstremi mund t’i heqin nga puna.
“Sot edhe pse data shënon 17 Infermierët e QSUT ende nuk kanë marre pagën e cila duhej të merrej brenda datës 10. Të mësuar tashmë për vonesat e pagave, por sidomos kur vjen muaji janar, ku pagat e tyre mund të merren dhe rreth datës 20 ankohen, por të frikësuar mos i dëgjon ndokush. Kemi frikë të flasim se dhe në çdo turn e dimë që caktojnë nga një spiun, apo sidomos koordinatorët e administratoret kaq duan dhe të vjen shkresa për vërejtje, lëvizje nga puna. Na lëvizin ku të duan pavarësisht sa eksperiencë kemi dhe sa të kualifikuar jemi. Thonë që kontratën e ke me spitalin thjesht infermier, por pozicionin ua cakton spitali aty ku sheh që ka nevojë“, shkruan Shoqata e Infermierëve.
Përmes kësaj ankese, infermierët shpreh shqetësimin se disa poste në spitale janë kthyer në monopol nga njerëz që nuk kanë as kualifikimin e duhur, por qëndrojnë me urdhër partie. Ata shprehen se edhe pse po shfrytëzohen kanë sërish frikë të flasin për të drejtat e tyre në punë.
“Ky është fenomen që ndodh vetëm ndaj infermiereve dhe sanitareve pasi postet e tjera drejtuese si kryeinfermieret janë bërë post monopol të individëve të caktuar ku shpesh herë s’kanë as kualifikimin e duhur për të qenë në atë post drejtues, por miqësi. Partia i mban aty dhe ata dinë vetëm të japin urdhra e të bëjnë shkresa, pasi kur vjen puna për diskutim ose parashtrimin e një ankese ato as ta marrin parasysh duke thënë s’më pyet njeri mua dhe s’kam pse rrezikoj për ty. E ne të gjitha këto, ku duket që infermierët janë me të bulëzuarit, kudo janë thjesht punëtore për të plotësuar nevojat e spitalit e asgjë më shumë“, shkruhet në denoncimin e tyre.
Ndër të tjera tregojnë se ndihen edhe të rrezikuar pasi punojnë pa protokolle dhe janë në rrezik të përditshëm infektimi, në një kohë që vendi po përballet prej më shumë se 2 vitesh me pandeminë e COVID-19. Kujtojmë se pak ditë më parë një ankesë e tillë u bë dhe nga mjekët e qytetit të Elbasanit, të cilët paralajmëruan se do të ndërpresin shërbime nëse nuk marrin pagat.
