Seanca e sotme në Komisioni Hetimor ka vazhduar me përplasje të ashpra mes Veliajt dhe Tabakut. Kryebashkiaku nuk i përgjigjej pyetje të kësaj të fundit, por vazhdimisht e akuzonte se me komisionin po bënin veprime të pandershme dhe i kujtonte vazhdimisht se ka paditur Tabakun për shpifje në SPAK.
Gjithashtu gjatë debatit, Tabaku i ka kërkuar Veliaj të pushojë dhe të mos bëjë propagandë por t’u përgjigjet pyetjeve. Ajo u shpreh se Veliaj po mban peng Komisionin, pasi nuk ka ligj që mund të justifikoj autorizimin që ka dhënë ai për inceneratorët.
Pjesë nga debati
Tabaku: Jeni shprehur pro për autorizimin si kryetar i bashkisë së Tiranës, në cilën pikë jeni autorizuar për mbetjet?
Veliaj: Më autorizon ligji që ishte bërë nga qeveria Berisha , kryetarët e njësive të qeverisjeve vendore janë përgjegjës për mbetjet që bëhen. Kam zbatuar ligjin që mazhoranca juaj ka miratuar dhe në zbatim të ligjit kemi bërë punën për të pasur një Tiranë të pastër.
Tabaku: Cila pikë në cilin nen ju ka autorizuar ju
Veliaj: Më ka autorizuar pika 1 i nenit 5 për vetëqeverisjen vendore, kryetari i bashkisë ka detyra të mbajë pastër qytetin dhe jemi përfaqësues i saj për marrëdhëniet me të tretë për të kthyer përgjigje në emër të bashkisë së Tiranës. Keni spekuluar, po ju betoheni që nuk do gënjeni sepse ju kam dëgjuar në mënyrë sistematike. Ju mos më ndërpret
Tabaku: Dëshmitar fokusohu ke pyetjet e mia
Veliaj: Unë ju respektova, nuk mund të bëni gjyqtaren , kjo që po thoni është e pandershme
Tabaku: Nuk më bën dot pyetje mua, mos prishni mbledhjen. Veliaj më lër të vazhdoj pyetjet sepse unë jam betuar në Kuvendin. Pyetjet i bëj unë s’mund të flasësh çfarë të duash, është e pandershme të vish këtu të bësh propagandë. Duhet ti përgjigjesh, është e pandershme të vish të marrësh peng .
Veliaj: Mos bëni zhurmuesin, qetësohu dhe më lër të flas…
