Kreu i PD, Lulzim Basha, ka zhvilluar një takim me strukturat e degës së PD-së , nr.12 në kryeqytet. Gjatë fjalës së tij, Basha ka hapur sërish diskutimet për çështjen e inceneratorëve. Sipas Bashës vetëm qeveria Rama mund të vjedh nga xhepat e qytetarëve 430 milionë euro për një aferë korruptive që nuk kryen as shërbimin e saj. Sipas tij, të përfshirët e ndjejnë rrezikun, prandaj po sulmojnë PD.
“Vetëm një qeveri zemërkazëm mund t’ia dalë të përvetësojë me ato skema që i kanë parë të gjithë shqiptarët 430 milionë euro të shqiptarëve për një gjoja skemë të djegies së plehrave që siç e pamë të gjithë, ka qenë një skemë e avullimit të parave të shqiptarëve. Unë ta kap me presh në duar duke vjedhur 420 mln euro, ti shpif për mua. Ne këto sulme s’na bëjnë përshtypje, se këto sulme nga ata që janë kapur me presh në duar duke vjedhur nuk janë gjë tjetër veçse certifikata që po punojmë.
Kemi 6 vite që i denoncojmë me emër njerëzit që e bënë këtë, por u desh një komisioni hetimor parlamentar si ai që përfundoi punimet javën e kaluar, që ato të cilat Partia Demokratike i denoncoi prej vitesh me radhë, të provoheshin me fakte dhe me dëshmi të vet zyrtarëve se ishin të vërteta, të dhimbshme dhe kriminale”, tha ai.
Sipas Bashës edhe gjatë dëshmisë miqtë e Edi Ramës dhe këta punonjës të qeverisë së korruptuar tentuan të devijonin qëllimin e komisionin dhe të cungonin të vërtetën , por nuk ja arritën.
“Që nga zyrtari më i ulët që doli para këtij komisioni, deri tek koka e qeverisë dhe e kësaj afere, nuk ia dolën dot ta fshihnin të vërtetën. Si ia dolëm që komisionin që Edi Rama donte ta mbyllte dhe mos të vinte të dëshmonte, ta çonim deri në fund. Së pari, sepse ne qëndrojmë fortë për të vërtetën. Qëndrojmë fortë për të drejtën, qëndrojmë fortë për atë që është e mira publike, pra e mira e njerëzve”, u shpreh ai.
