8 prill 2016, ceremonia në sheshin “Skënderbeu” në Prishtinë.
Në seancën e së enjtes të Kuvendit të Republikës së Kosovës do të jetë vetëm një pikë e rendit të ditës – betimi i Hashim Thaçit si President i vendit. Lajmin e ka konfirmuar për mediat e Kosovës sekretari i Kuvendit, Ismet Krasniqi. Ai ka thënë se betimi i presidentit të ri do të mbahet në sallën kryesore të këtij institucioni. Ndërsa një ditë më pas, më 8 prill 2016, do të organizohet ceremonia e inaugurimit të tij në sheshin “Skënderbeu”, në Prishtinë.
Sipas stafit të ngushtë të Thacit, më 8 prill do të ketë parakalim të dy presidentëve, Atifete Jahjaga dhe Hashim Thaçi. “Do të ketë parakalim të dy presidentëve, Jahjaga dhe Thaçi, para Gardës së Nderit, do të ketë një dorëzim-pranim ceremonial të detyrës dhe Jahjaga do t’ia dorëzojë presidentit Thaçi një kopje të Kushtetutës së Republikës së Kosovës”.
