Kujtohet 55-vjetori i shqiptarëve të Çamërisë, kur disa çamë u vranë nga regjimi famëkeq komunist, ndër të cilët edhe Teme Sejko
Shoqata “Çamëria” ka kujtuar 55-vjetorin e shqiptarëve të Çamërisë që u vranë në gjyqin famëkeq të Teme Sejkos. Në këtë aktivitet ishin të pranishëm kryetari i Shoqatës “Çamëria”, Abaz Hado, kryetari i PDIU-së, Shpëtim Idrizi, deputeti Tahir Muhedini etj.
Kryetari i PDIU-së, Idrizi u shpreh para anëtarëve të Shoqatës “Çamëria” se shqiptarët e çamërisë kanë luftuar kundër gjermanëve dhe nuk kanë bashkëpunuar me ta. Idrizi tha se në vizitën tjetër ministri Kotzias do të pritet nga 150 mijë shqiptarë.
“Kotzias si “Baron Portokalli” tek aventurat e Ciplones, po flet broçkulla në shypin grek. Një ministër i jashtëm i cili sillet si fëmija i përkëdhelur i lagjes, që kur është te lagjja e tjetrit ruhet, ndërsa kur kthehet te lagjja e vet flet borcukulla dhe krekoset. Në mediat greke thotë që çështja çame nuk ekziston, ajo vdiq, çamët janë 150 veta. Një gjuhë që unë nuk e kuptoj dot se si mund ti shkojë një qytetari, jo një vendi si Greqia, por as edhe një vendi në Afrikë. Të thuash që nuk u përmend çështja çame në Shqipëri, kur për herë të parë, ai jo vetëm e përmendi, por gjeti edhe mënyrat e tij për ta minimizuar atë. Më vizitën e radhës të ministrit Kotzias, e siguroj se do ta presim me 150 mijë shqiptarë. Shqiptarët e çamërisë nuk kanë bashkëpunuar kurrë me gjermanin dhe 2 batalione kanë luftuar kundër tyre”, tha kryetari i PDIU-së.
Gjithashtu z.Idrizi falenderoi qeverinë shqiptare për qëndrimin ndaj çështjes çame dhe theksoi se shqiptarët e çamërisë janë persekutuar edhe nga Enver Hoxha.
“Dua të falenderoj Presidentin e Republikës Bujar Nishanin, Kryeministrin Edi Rama, Ministrin e Jashtëm Ditmir Bushati për qëndrimin e tyre ndaj çështjes çame. Kjo ishte hera e parë që qeveria shqiptare ishte në një pozitë reciprociteti me Greqinë.
Nëse shqiptarët e çamërisë i vrau padrejtësia e një shteti, i cili kishte një strategji spastrimi deri në genocid, rasti i tragjedisë së dytë të shqiptarëve të Çamërisë në Shqipëri, ka qenë dhe ka filluar, me masakrimin, vrasjen e burrave të çamërisë. Atë që tentoti ta bënte Napolon Zerva dhe Greqia shqiptarëve të çamërisë, tentoi ta bënte edhe diktatori Enver Hoxha”, u shpreh z.Shpëtim Idrizi.
Kryetari i Shoqatës “Çamëria” Abaz Hado, tha se shqiptarët e çamërisë kanë luftuar kundër gjermanëve. Ai u shpreh se çamët do të vazhdojnë të kërkojnë të drejtat e mohuara nga Greqia.
Ndërsa deputeti Tahir Muhedini tha se atë që ka bërë Greqia me shqiptarët e çamërisë nuk mund ta harrojë askush, ndërkohë që theksoi se çështja çame shumë shpejt do të ketë një zgjidhje.
