PDIU ka zhvilluar një takim të madh me simpatizantë në qytetin e Elbasanit për zgjedhjet e 25 qershorit.
Kreu i PDIU Shpëtim Idrizi ka prezantuar kandidatët për deputetë në Elbasan. Idrizi theksoi: “PDIU është dera e hapur e çdo qytetari, ndaj besoni tek ne, sepse ne kemi Veç një Atdhe!”
Gjatë takimit me simpatizantët në këtë qytet Idrizi i ka shprehur mirënjohjen qytetarëve të Elbasanit për gjithçka që kanë bërë për çamët, të cilëve u hapën dyert për të dëbuarit. Mirënjohja shkon për këto familje, të cilat kanë mbajtur gjallë Çështjen Çame.
Nënë Hedo Ademi ka marrë titullin e mirënjohjes së Shoqatës Çamëria. Kjo zonjë e ka ndjekur në çdo hap këtë lëvizje patriotike, pavarësisht moshës.
Deklarata e plotë
PDIU nuk është si partitë e tjera që flasin për kauza, por sa vijnë në pushtet bëjnë pausa. Do qeverisim me atë forcë politike që mendon si ne, veç për një atdhe. Politika shqiptare ju ka lënë pa shpresë dhe mendojnë të ikin, por unë mendoj se ky vend ka shpresë
Kreu i PDIU tha se partia e tij nuk ka kandidatë të importuar, por ka njerëz që janë pranë halleve dhe probleme të qytetarëve.
PDIU nuk ka kandidatë të importuar, por i ka qytetarë të Elbasanit që janë çdo ditë pranë halleve të qytetarëve. Ata janë njerëz që u kanë dalë për zot familjes së tyre dhe qytetarëve të këtij qyteti. Entuziazmi juaj është një obligim për ne. Ne kemi parë për 27 vjetë politikën shqiptare ku thonë se duhet të referojmë Shqipërinë. ne u themi që ne radhë të parë duhet të reformojnë veten. Ne kërkuam që të garonim të gjithë më vete, në korsinë tonë. Korsia e PDIU është e atyre që e duan vatanin. Ne donim të garonim të vetëm në zgjedhje dhe prania juaj na bën optimist më shumë se kurrë, pasi PDIU nuk është një parti e vogël, por parti e madhe.
