Nënkryetari i Kuvendit pyet ministrin e Jashtëm nëse i kishte kërkuar palës greke ngritjen e varrezës çame në vendin fqinj.
Pasi ka dëgjuar raportin e ministrit Bushati për vizitën në Greqi, kryetari i PDIU-së, Shpëtim Idrizi, ka vlerësuar si të avancuar qëndrimin e ministrit për çështjen çame. Por, ai thekson se qëndrimi i Bushatit për ta parë si çështje pronësore, por jo e të drejtave të njeriut është i padrejtë. Idrizi ka kërkuar nga ministri të jetë konkret duke e pyetur se çfarë e pengon atë ta cilësojë qartë fjalën “genocid grek ndaj çamëve”.
Idrizi ka kërkuar nga Bushati shpjegim edhe lidhur me një tjetër kërkesë atë të ngritjes së varrezës çame në Greqi.
“Nuk keni pse të keni turp nga çështja çame, as të fshiheni për të. Është çështje e të drejtave të njeriut, dhe pasojat e genocidit vazhdojnë edhe sot ndaj dhe ne kërkojmë, dhe ju duhet ta kishit kërkuar, të ngrihet varreza lapidar e çamëve. Efeketet e ligjit të luftës me Greqinë vazhdojnë edhe sot ndaj dhe ne duhet të kërkojmë statusin e minoritetit shqiptar në Greqi”, tha Idrizi.
Ai i ka kërkuar Bushatit që të jetë i ftuar në ceremoninë e 25 vjetorit të marrëdhënieve mes Shqipërisë dhe Greqisë.
