Kryetari i PDIU-së takohet në Peshkopi me rastin e zgjedhjeve në parti: Sikur të ndiqnin udhën që gjetën në kohët e lashta kuajt, Peshkopia do të ishte bashkuar me Tiranën prej kohësh
“Rruga e Arbrit duhet të mbarojë, sepse nuk ka më asnjë justifikim. Edhe sikur të ndiqnin udhën që gjetën në kohët e lashta kuajt, Peshkopia do të ishte bashkuar me Tiranën prej kohësh.”
Kjo ishte deklarata e kryetarit të PDIU-së Shpëtim Idrizi në një takim me eletoratin në Peshkopi.
Në fjalën e tij kryetari i PDIU-së, Idrizi, ka theksuar se shifra e varfërisë në Shqipëri është ende e frikshme, një problem kaq i madh që nuk mund të vazhdojë të justifikohet me tranzicionin.
“Shqiptarët janë popull punëtorë”- ka thënë Idrizi duke theksuar se politikanët duhet të jenë po ashtu aq punëtorë për t’i shërbyer këtij populli dhe jo për t’i lënë në varfëri siç po ndodh.
“Varfëria në Shqipëri është ende një sfidë dhe nuk ka më asnjë kuptim fjala tranzicion. Nuk justifikohet më varfëria me fjalën tranzicion e reforma”, tha Idrizi. Ai ka theksuar gjithashtu se nuk është e drejtë retorika që përdoret ndër politikanë, të cilët i ndajnë shqiptarët në të Maqedonisë të Kosovës e Shqipërisë.
“Kombi është një”, ka thënë Idrizi duke theksuar se nuk ka shqiptarë të Shqipërisë e shqiptarë të Maqedonisë. Ka thjesht shqiptarë.
