Ashtu siç dyshohej nga policia, Mario Majollari u ekzekutua për hakmarrje. 12 orë pas ngjarjes, Policia e Shetetit konfirmon se ka identifikuar dhe shpallur në kërkim autorin e dyshuar të krimit, Kastriot Gjuzi, 40-vjeç.
Babai i Marios, Avni Majollari ka vrarë dy persona, po për hakmarrje para 18 viteve në rrugën e Dajtit në kryeqytet. Një nga viktimat është Ilir Gjuzi, vëllai i Kastriot Gjuzit.
Mario Majollari 28 –vjeç, banues në Kinostudio, në Tiranë, u ekzekutua me tre plumba natën e kaluar pranë banesës së tij. Atij iu bë pritë nga një person i armatosur në një rrugicë të errët, teksa po i afrohej shtëpisë.
Mario Majollari kishte kërkuar azil në Suedi pasi i rrezikohej jeta nga një hakmarrje e mundshme për shkak të krimeve që mbanin autorësinë e babait të tij, por kërkesa i ishte refuzuar nga autoritetet suedeze. Ai kishte pak kohë që ishte kthyer në Shqipëri.
