Drejtori i Përgjithshëm i Policisës së Shtetit, Muhamet Rrumbullaku, ka firmosur përjashtimin nga Policia e Shtetit të nënkomisarit Sh.Gj, me detyrë specialist i Policisë së Rendit në Komisariatin e Shkodrës.
Efektivi i policisë shfaqej në një video duke marrë para nga një zarf që i përkiste një qytetari, ndërsa shumën e fshehu nën kapelen që mbante në kokë.
“Në vijim të informacionit të dhënë nga Drejtoria Vendore e Policisë Shkodër, për pezullimin nga detyra të punonjësit të Policisë nënkomisar Sh. Gj., me detyrë specialist i Policisë së Rendit në Komisariatin e Policisë Shkodër, sqarojmë se:
Pas transmetimit të një rasti tjetër të abuzimit me detyrën nga ky punonjës policie, Drejtori i Përgjithshëm i Policisë së Shtetit ka firmosur përjashtimin e menjëhershëm nga Policia e Shtetit të punonjësit të Policisë nënkomisar Sh. Gj.
Ndërkohë AMP është duke kryer veprimet procedurale për arrestimin e tij”, thuhet në njoftimin e Policisë së Shtetit.
