Nga Dom Gjergj Meta
Njeriu është i destinuar t’i përkasë të mirës, paqes dhe vllazërisë, të cilat nuk përkojnë dhe nuk shterrohen vetëm brenda formave kulturore të një epoke e brenda formave historike të një apo më shumë religjioneve.
Hyji është përtej gjithçkaje që ne mund të përfytyrojmë apo përjetojmë. Ai është gjjthmonë më shumë.
Nëse ka diçka që mund ta identifikojë Hyjin ajo është dashuria që në tradita të ndryshme religjioze ka të bëjë me mëshirën, dhembshurinë (rehem, rahim, misericordia). Nëse do të zhyteshim në Hyjin dashuri, do të donim edhe të ngjashmin tonë e nëse do të donim të ngjashmin do të gjenim Hyjin. Zoti na don vëllezër. Urrejtja, përbuzja, përcmimi ndaj njëri-tjetrit e fyen Zotin më shumë se sa fyerja ndaj tij.
Sa shumë fyhet sot Zoti në shtetet e Afrikës, në shfrytëzimin e punëtorëve dhe të pasurive të popujve, në mbytjen e te palindurve me anë të abortit, në eutanazinë e të sëmurëve, në vrasjen për shkak të luftrave dhe të terrorizmit, në mohimin e të drejtave të të varfërve, të grave, të fëmijëve, në mospranimin e emigrantëve etj?
Ne njerëzit megjithatë jemi në gjendje ta ndryshojmë realitetin atëherë kur shohim tek tjetri, një të ndryshëm që është vëllai dhe motra ime, sepse brenda tij/saj është gdhendur shëmbëllimi i Hyjit. Çdo njeri është një i ndryshëm nga unë, por nuk është një armik apo i huaj për mua. Është një i ndryshëm i ngjashëm me mua në thelbin e tij.
Ju uroj një ditë të bukur e plot diell në zemër!
+ dom Gjergji
