Një ngjarje e rëndë ka ndodhur ditën e sotme në Greqi, ku një shqiptar ka humbur jetën në mënyrë tragjike gjatë punës në një kantier ndërtimi në zonën e Janinës. 46-vjeçari, baba i dy fëmijëve ishte duke punuar në një projekt për ndërtimin e rrjetit të ujërave të zeza dhe gjatë gërmimeve dheu është shembur papritur, duke e zënë poshtë dhe duke i shkaktuar vdekjen.
Ndërkohë, në vendin e ngjarjes kanë mberritur forcat e shpëtimit dhe ambulanca, ndërsa ekipet mjekësore bënë përpjekje intensive për ta rikthyer në jetë, por fatkeqësisht nuk u mbijetoi plagëve të rënda. Pas aksidentit fatal, autoritetet greke kanë arrestuar përgjegjësin e kantierit, ndërsa kanë nisur hetimet për të zbardhur rrethanat e plota të ngjarjes dhe për të identifikuar përgjegjësitë.
Në terren ndodhet edhe ekipi i Qendrës së Punës në Janinë, i cili po heton kushtet e sigurisë në punë dhe shkaqet që çuan në këtë humbje tragjike.
gijotina.com/
