Partia Drejtësi Integrim dhe Unitet, kujton sot Ditën Ndërkombëtare të Përkujtimit të Holokaustit, ku ranë viktima të gjenocidit të Gjermanisë naziste gjashtë milionë hebrenj.
Përmes një deklarate për shtyp, PDIU deklaron se harresa dhe mohimi i viktimave të gjenocidit, veçanërisht në nivelin shtetëror, është krim jo vetëm ndaj viktimave të pafajshme, por edhe brezave të ardhshëm pasi shkatërron përspektivën e paqtimit mes popujve.
Deklarata e plotë
Këtë vit, ne përkujtojmë 77-vjetorin e gjenocidit ndaj shqiptarëve të Çamërisë, ndaj askush nuk i kupton më mirë se ne dhimbjet e përmasave të tilla. PDIU angazhohet për të bashkuar forcat me këdo që përpiqet të rrisë ndërgjegjësimin e publikut dhe kërkojë drejtësi për çështjet e krimeve kundër njerëzimit dhe gjenocidit.
Holokausti është një nga kapitujt më të errët të historisë njerëzore. 27 janari, që përkon me përvjetorin e çlirimit të kampeve të vdekjes Auschvitz-Birkenau, shënohet si ditë e kujtesës së Holokaustit, por edhe çdo gjenocidi tjetër.
Sot, ne nderojmë të mbijetuarit dhe historitë e tyre të guximit, shpresës dhe këmbënguljes kundër së keqes. Po ashtu, përulemi me mirënjohje ndaj heronjve shqiptarë që shpëtuan hebrenjtë sipas parimit “shtëpia e shqiptarit është e Zotit dhe e mikut”.
Përkujtimi i viktimave të Holokaustit mbetet i rëndësishëm për sa kohë që shprehjet e ndryshme të urrejtjes dhe dhunës me bazë racore, etnike, apo fetare vazhdojnë të rishfaqen në mënyra të ndryshme.
Harresa dhe mohimi i viktimave të gjenocidit, veçanërisht në nivelin shtetëror, është krim jo vetëm ndaj viktimave të pafajshme, por edhe brezave të ardhshëm pasi shkatërron përspektivën e paqtimit mes popujve.
Në këtë ditë, përulemi me nderim të thellë para kujtimit të viktimave të Holokaustit dhe shprehim solidaritetin tonë për popullin mik hebre dhe komunitetin hebre të Shqipërisë. Këtë vit, ne përkujtojmë 77-vjetorin e gjenocidit ndaj shqiptarëve të Çamërisë, ndaj askush nuk i kupton më mirë se ne dhimbjet e përmasave të tilla.
PDIU angazhohet për të bashkuar forcat me këdo që përpiqet të rrisë ndërgjegjësimin e publikut dhe kërkojë drejtësi për çështjet e krimeve kundër njerëzimit dhe gjenocidit.
“Kurrë më! – Never Again!”
