Ka përfunduar me një ngjarje historike ndeshja e fundit e Kategorisë Superiore në “Loro Boriçi”. Skuadra e Tiranës ka rënë për herë të parë në historinë e saj në Kategorinë e Parë, ndërkohë që Vllaznia mori atë që donte, një barazim 0-0, për të mbijetuar në Superiore.
Pjesa e parë në një stadium të mbushur plot u karakterizua nga një epërsi e vendasve të cilët nuk gjetën dot golin. Në pjesën e dytë Tirana u hodh në sulm, por lojtarët shkodranë arritën ta vononin lojën në çdo lloj mënyre që mundën duke arritur ta mbyllin takimin me rrjeta të paprekura.
Ndërkohë sot u luajtën ndeshjet e fundit të Superligës. Rezultatet e ndeshjeve të tjera:
- Korabi – Flamurtari 0-3
- Laçi – Teuta 2-1
- Luftëtari – Kukësi 1-0
- Skënderbeu – Partizani 2-2
Nga njëra ana lojtarët dhe stafi i Vllaznisë kanë shpërthyer në festë, duke u përqafuar në fushë, ndërsa trajneri Cungu ka hequr këmishën për të festuar para ultrasve kuqeblu këtë mbijetesë të ethshme.
Nga ana tjetër, lojtarët bardheblu janë shtrirë në tokë të dërrmuar dhe shumë prej tyre nuk kanë mbajtur lotët për këtë ditë historike në aspektin negativ, të ndërgjegjshëm se tashmë do të kujtohen si ata që nuk arritën të mbanin Tiranën në elitën e futbollit shqiptar.
