Ish-kryeministri Sali Berisha është në listën e personave që do të merren në pyetje nga SPAK për hetimin në lidhje me padinë e bërë nga Taulant Balla për privatizimin e ish-kompleksit Partizani.
Berisha është shprehur ditën e sotme për gazetarët jashtë seancës plenare se do të paraqitet në SPAK sa herë ta thërrasin, teksa ka theksuar se kryeministri Edi Rama përpiqet të mbulojë aferat e tij me çështje të tilla.
“Nuk më ka dërguar asnjë fletëthirrje, por i përgjigjem çdo fletëthirrje. Ju do jeni aty të gjithë të bëjmë një konferencë shtypi të shkëlqyer. Përpjekje mjerane e Ramës për të mbuluar vjedhjet, por unë do shkoj gjithmonë sa herë të thërritem. Edhe kur falsiteti noton në detin e falsitetit unë nuk hezitoj kurrë të përgjigjem. Ta keni të qartë!”, tha Berisha.
Berisha do të thirret në SPAK për të dëshmuar javën e ardhshme bashkë me ish-ministrin Arben Imami, ndërsa ditën e djeshme për të njëjtën çështje dëshmoi ish ministri i Mbrojtjes Fatmir Mediu.
