Në listën e shpallur këtë të premte nga trajneri italian i Kombëtares shqiptare të futbollit, Christian Panucci, binte në sy edhe një tjetër emër që grumbullohet për herë të parë. Ai është Herdi Prenga, qendërmbrojtësi 23-vjeçar i ekipit kroat, Inter Zapresiç.
Dy vitet e para si futbollist profesionist i kaloi në formë huazimi te Sesvete dhe Lokomotiva e Zagrebit, me këtë të fundit që do ta blinte përfundimisht në vitin 2017 nga rivalët kryeqytetas. Por pas dy sezonesh me këtë ekip, Prenga do të largohej për te Inter Zapresiç.
Sa i përket karrierës ndërkombëtare, Prenga u grumbullua filimisht me Kombëtaren kroate të U17-s, duke luajtur në raundin “elitë” të Europianit të vitit 2011. Pasi luajti çdo ndeshje të atij edicioni u thirr nga trajneri Dinko Jeliçiç me përfaqësuesen e moshave U19, për të luajtur në kualifikueset europiane të kësaj grupmoshe. Ngjitja e tij do të vijonte me Kroacinë U21, i thirrur nga trajneri Nenad Graçan, por pa luajtur.
Në janar të vitit 2015, Prenga do të shprehte për mediet shqiptare dëshirën e tij për të ndjekur gjurmët e të atit, Besnik Prenga, duke veshur fanellën kuqezi, pasi do të ishte një nder për të.
Pas kësaj deklarate, ish-trajneri Skënder Gega i 21-vjeçarëve shqiptarë do ta kontaktonte 20-vjeçarin dhe familjen e tij e vetëm një muaj më vonë ai do t’i çonte ftesë për grumbullim me ekipin e moshave nën 21 vjeç.
Herdi Prenga, nga Kroacia te kuqezinjtë, në gjurmët e të atit
