Bashkia e Gjirokastrës ka reaguar për herë të parë pas masakrës që u bë pak ditë më parë me helmimin masiv të kafshëve të rrugës. Në një lidhje me Skype me “Abc-ja e mëngjesit” nënkryetarja e Bashkisë Jorida Muho hodhi poshtë akuzat që janë ngritur ndaj tyre se kanë të bëjnë me këtë ngjarje.
“Në radhë të parë do të ishte e domosdoshme që të thoja dhe me zë të lartë që bashkia nuk ka dhënë asnjë lloj urdhëri që pretendohet nga zotëria Kokalari, nuk ekziston qoftë i shkruar apo verbal. Në radhë të dytë, sikurse qytetarët e tjerë që kanë patur interes për këtë masakër në Gjirokastër, shqetësimi ynë ka qenë akoma më i madh. Kemi biseduar me bizneset që kanë kamera në ambientet dhe janë dy filmime. I pari është pranë një hoteli të njohur në zonën muzeale të qytetit ku duket një punonjës i Bashkisë që për shkak të fluksit dhe mirëmbajtjes kemi vendosur dhe turn nate dhe ka kohë që vazhdon. Nëse do të shikoni me imtësi videon nuk ka asnjë inkriminuese që thjesht është detyra e mirëmbajtjes së rrugëve dhe monitorimit të koshave. Ndërsa videoja e dytë që ka qarkulluar është momenti që qeni ka qenë i shtrirë përpara bordurës 18 Shtatori dhe një qytetar që nuk është punonjësi i Bashkisë e ka parë dhe e ka marrë qenin duke e hedhur në koshin e mbeturinave. Ne ftojmë të gjithë ambientalistët që kanë në dispozicion materiale që inkriminojnë këdo, t’ja vënë në dispozicion Prokurorisë pasi e duam dhe ne po aq sa ata pasi është ngarkuar në kurriz të Bashkisë. Të dalë para përgjegjësisë personi që e ka bërë këtë gjë.“, u shpreh Muho.
Ajo bëri thirrje ndaj aktivistëve të vënë në dispozicion materialet që disponojnë për të vënë para drejtësisë personat përgjegjës. Kjo solli reagimin e aktivistit Indrit Osmani, i cili tha se alibia që po përdor Bashkia tregon qartë që janë përgjegjës.
Indrit Osmani: Me një prozhektor shkon në një cep lagjeje dhe po kërkon plehra. pra alibia që tregoni duket e qartë që jeni fajtorë dhe organizatorë të asaj që ka ndodhur. Nuk mund t’i kërkoni qytetarëve t’i denonconi.
Jorida Muho: Ju informova saktë është një qytetar i thjeshtë pasi nuk është një cep lagjeje është sheshi Çerçiz, zona ku ndodhet koshi.
Indrit Osmani: Çfarë kërkon punonjësi një orën 1 të natës
Jorida Muho: Deri në 6 të mëngjesit duhet të bëjë punën e tij
Indrit Osmani: Mbledh bishtat e cigareve…Ndërroni alibi se dukeni që jeni fajtorë. Thjesht nuk e mendonit se do të bëhej kaq e madhe, ju takon juve të shkoni të Prokurori të bëni një denoncim.
