Devoll Hydropower: Kemi marrë leje në Ministrinë e Bujqësisë
Prej tre ditës Devoll Hydropower ka mbyllur portat e HEC-it të Banjës duke tharë plotësisht rrjedhën e lumit Devoll. Për pasojë banorët e Bashkisë së Cërrikut, po pësojnë dëme të mëdha ekonomike.
“Janë shkaktuar dëme të mëdha, pasi nuk kemi ujë për të kryer vaditjet, ka sipërfaqe të mëdha me pjeshkë e serra”, ka thënë një banor i zonës. Ndërkohë kryetari i Bashkisë së Cërrikut i ka kërkuar me një shkresë zyrtare “Devoll Hydropower”, ta zgjidhë problemin sa më parë.
Nga ana tjetër, kompania “Devoll Hydropower” ka deklaruar se mbyllja e portave është bërë konform të gjitha rregullave dhe parashikimeve. Kompania ka sqaruar se ka marrë leje nga Ministria e Bujqësisë që për dy javë të mos ketë rrjedhje të ujit në lumin Devoll.
