Fotoja me ushtarët, Kotzias: Akt nacionalist
Ministri i jashtëm grek Nikos Kotzias ka deklaruar se vendi i tij nuk do të vendosë veto për integrimin e Shqipërisë në BE.
Në një intervistë për televizionin publik grek ERT, Kotzias u shpreh së do kërkojë që problemet mes dy vendeve të zgjidhen në bazë të së drejtës ndërkombëtare dhe europiane.
Ndërsa më tej ai u shpreh se në raportin e fundit të Brukselit për Shqipërinë janë vendosur të gjitha kushtet dhe çështjet që Greqia ka vënë në dukje.
“Qeveria e Shqipërisë besonte se integrimi europian do të ishte një shëtitje, kujtonte se do të merrte pa asnjë shkëmbim edhe hapjen e negociatave të anëtarësimit. Por, nuk mund të luajë me nacionalizmin, të thotë gjëra të ndryshme jo serioze. Ne po ju kujtojmë atyre se jemi një vend që duam të zgjidhim problemet tona në bazë të së drejtës ndërkombëtare dhe europiane. Prandaj dhe në raportin e fundit për perspektivën e anëtarësimit të Shqipërisë në BE, u përfshinë gjithë kushtet dhe çështjet që kemi vënë ne në dukje. Është një tekst “qëndisje” e plotë, e kopsitur për politikën e jashtme të Greqisë. Me ndihmën e diplomatëve tanë për herë të parë në këtë tekst janë të gjitha kërkesat dhe të gjitha çështjet që kemi identifikuar. Nuk është e nevojshme të vendosim veto. Po të mos përmbushen, shqiptarët do të kenë problem me Komisionin Europian dhe Këshillin Europian”, tha ndër të tjera Kotzias.
Më tej Kotzias u shpreh se Shqipëria duhet të respektojë pakicat greke përfshi dhe e drejta e pronës së tyre.
Gjithashtu kreu i diplomacisë helene foli dhe për ushtarët greke me origjinë shqiptare, të cilët bënë simbolin e shqiponjës: “…në rajon ka disa shtete që po transformohen si shtete nacionale dy dekadat e fundit dhe kanë një popullsi shumë të re dhe ndonjëherë kjo shprehet me një dinamizëm që mund të shpjerë te nacionalizmi.”
