KE: Finalizoni reformën sipas rekomandimeve të Venecias
Më 30 mars do të jetë në Tiranë Komisioneri për Politikat Fqinjësore dhe Negociatat për Zgjerimin Johanes Hahn. Zyrtari I lartë europian do të bashkëdrejtojë me kryeministrin Rama tryezën e dialogut të nivelit të lartë mes BE-Shqipëri. Sipas publikieve të KE parapërgatitjet për këtë tryezë janë bërë gjatë një takimi në nivel ekspertësh të zhvilluar në Tiranë në datat 3 dhe 4 mars. Por pavarësisht arsyes së qenies në Tiranë, kryefjalë e bisedimeve pritet të jetë reforma në drejtësi.
KE ka bërë thirrje që reforma në drejtësi të finalizohet në përputhje me rekomandimet e Komisionit të Venecias. Por palët politike në Tiranë edhe pas rekomandimeve të Venecias nuk po arrijnë të merren vesh mes tyre. PD dhe LSI kërkojnë konsensus politik, ndërsa në anën tjetër PS kërkon që reforma deri në fund tu besohet ekspertëve me ndërmjetësimin e OPDAT dhe EURALIUS nëse është e domosdoshme.
Kjo përplasje e re mes palëve duhet të marrë fund sa më parë, pasi në të kundërt nuk është çudi që të shkohet në zgjedhje të parakohshme.
