Këngëtarja Rita Wilson ka deklaruar se ka pësuar “efekte anësore ekstreme”, pasi u trajtua me ilaçin eksperimental për Covid-19, Chloroquine, në një spital australian.
Wilson, e cila ishte duke udhëtuar në Australi dhe burri i saj, aktori i famshëm, Tom Hanks, i cili po xhironte një film për Elvis Presley, u testuan pozitivë me Covid-19 në 12 mars, ndërsa ishin në Australi.
Chloroquine dhe hidroxichloroquine përdoren për të trajtuar malarien, por aftësia e tyre për të trajtuar Covid-19 është akoma e diskutueshme nga ekspertët, pavarësisht se është përkrahur nga Presidenti amerikan, Donald Trump.
Wilson dhe Hanks u pranuan në spitalin e Universitetit Gold Coast në Queensland për trajtim, ku Wilson tha se asaj iu dha chloroquine, pasi ajo kishte temperaturë 38,9 gradë C.
“Ata më dhanë chloroquine”, tha ajo për CBS. “Unë e di se njerëzit kanë folur për këtë ilaç. Por unë mund të them vetëm këtë: Temperatura ime u ul, por chloroquine kishte efekte anësore ekstreme, unë isha plotësisht me marrje mendsh, më vinte për të vjellë dhe muskujt i ndjeja shumë të dobët… Mendoj se njerëzit duhet të jenë shumë të vëmendshëm për atë ilaç”.
Një zëdhënëse e spitalit të Universitetit Gold Coast nuk konfirmoi nëse Hanks dhe Wilson iu dha chloroquine.
