Në një deklaratë për mediat në lidhje me grabitjen në Rinas, drejtoresha e komunikimit të Aeroportit Ndërkombëtar të Tiranës, Arlinda Çausholli, ka hedhur poshtë pretendimet e Policisë së Shtetit se nuk është njoftuar në kohë për ngjarjen. Ajo ka theksuar se punonjësit e policisë ishin në pistë kur ndodhi grabitja.
TIA: TIA ka zbatuar me përpikmëri njoftimin në kohë të policisë. Njoftimi i TIA për policinë është bërë në kohën kur makina bashkë me autorët e krimit ishte ende në vendngjarje. Autoriteteve të hetimit i janë dorëzuar të gjitha dokumentet që provojnë se ky njoftim është kryer nga menaxheri i operimit në detyrë i TIA-s, kundrejt sallës operative të policisë në Rinas.
Punonjësit e policisë kanë qenë prezentë në pistë vetëm pak metra nga ku ndodhi grabitja. Këtë e vlerësojmë si saktësi të domosdoshme informacioni.
Kompania ICTS është përgjegjëse vetëm për shërbimin e sigurisë aeroportuale, shërbim që nuk e zvogëlon detyrën dhe përgjegjësinë e policisë së shtetit. ICTS nuk ka asnjë të drejtë të ndërhyjë fizikisht, ICTS vepron e paarmatosur, e vetmja forcë e armatosur është policia e shtetit. Përsa i takon ruajtjes së rendit jashtë gardhit të aeroportit nga ku ka hyrë makina, kjo është përgjegjësi e policisë së shtetit. Sipas ligjit policia e shtetit duhet të sigurojë patrulla në të gjitha zonat.
