Grabitja në aeroportin e Rinasit, u bë shkak dhe për debatet në Parlament.
Ish-Kryeministri Sali Berisha bëri përgjegjëse qeverinë, ndërsa sipas tij lidhjet me krimin bënë të mundur realizimin e kësaj grabitjeje.
Ai tha se me deklaratën ku ai shprehej se nuk kishte përgjegjësi lau duart për ngjarjen, ndërsa akuzoi bankat se bashkëpunojnë me grabitësit.
Berisha: Ato janë kursimet tuaja. Mos kujtoni se ata u dobësuan, apo humbën dhjamë. I kanë të siguruara të gjitha, prandaj dhe i vjedhin bashkërisht me qytetarët. Ndaj bëhen brenda 20 minutash bëhen disponues të 20 milionë eurove.
Ndaj akuzave të Berishës, ka reaguar deputeti i Partisë Socialiste, Erion Braçe, i cili i ka cilësuar deklaratat e ish-kryeministrit si një sulm ndaj sistemit bankar.
Braçe: Natyrisht që është një deklaratë e pistë, e pavërtetë, e rreme dhe që synon gjithnjë e më shumë atë që Sali Berisha po e kërkon prej tre vitesh; destabilizimin e vendit.
Sekretari i Përgjithshëm i Lëvizjes Socialiste për Integrim Luan Rama, zbuti tonet me Ministrinë e Brendshme, por ai tha se nga grabitja në aeroport u cenua siguria kombëtare.
Rama: As nuk ia kam lejuar dhe as nuk ia lejoj vetes të bëj definicione për fajësi apo pafajësi të institucioneve apo drejtuesve të tyre. Po, thashë duhen bërë analizë e detajuar për të përcaktuar përgjegjësitë konkrete. Kush është kundër kësaj? Ku qëndron herezia në gjithë këtë qëndrim? Ku është cenuar rëndë siguria kombëtare, është sfiduar rëndë siguria kombëtare, nga një grup kriminel i armatosur, atëherë gjithsecili ta nxjerrë përgjegjësinë vetë.
