Është pezulluar nga puna mësuesi i anglishtes Albani Fetolli në shkollën 9 vjeçare “Dritëro Agolli” në Bilisht. Ky vendim u mor nga Drejtoria Arsimore Rajonale deri në vendimin përfundimtar të komisionit të etikës dhe disiplinës.
Komisioni i disiplinës dhe etikës së shkollës ka nisur hetimin pasi prindërit e disa nxënësve të klasës së tetë janë ankuar pranë drejtorisë së shkollës për dhunën e ushtruar ndaj fëmijëve nga mësuesi.
Lexo edhe: “Më gjej një shkollë me këto standarde”/ Mbyllja e kolegjit turk, Zhupa sfidon ministren Kushi
Njëri prej fëmijëve të dhunuar, pohoi për mediat se disa ditë më parë gjatë orës së mësimit, mësuesi i ka goditur me bidon me ujë. Sipas tij, janë dhunuar 4 nxënës mes tyre dhe një vajzë. Në komunikim telefonik me drejtoren e DAR, Vinjola Rota, sqarohet se ngjarja po vlerësohet si nga komisioni i etikës së shkollës, po ashtu edhe nga drejtoria rajonale arsimore.
