Kreu i Partisë Demokratike, Lulzim Basha, ka bërë një thirrje të fortë për kreun e Policisë së Shtetit, Gledis Nano, nga konferenca që po zhvillon me gazetarët. Ai i kërkoi Nanos që t’i japë Komisionit Hetimor për Inceneratorët informacion lidhur me të dhënat e sistemit TIMS. Basha tha se Nano po mban peng këto informacione pasi urdhërohet nga lart.
“I bëj thirrje Gledis Nanos, Policia e Shtetit nuk mund të mohojë informacionin e lëvizjes së personave, për të cilët është bërë kërkesa. Ja bëj këtë kërkesë, nga informacionet e ardhura nga PD, se ndalimi i raportimit të të dhënave të sistemit TIMS nuk është bërë me urdhër të Nanos, por me urdhër politik nga lart. Nuk ka lart, kur vjen puna te zbatimi i ligjit. Ndaj, z. Gledis Nano i bëj thirrje që brenda ditës së hënë, se si ministër i Brendshëm, që kam kontribuar në instalimin e sistemit TIMS, e di sa e lehtë është t’i kthehet përgjigje komisionit hetimor nëse këta persona kanë udhëtuar së bashku dhe sa herë. I kujtoj Nanos se mosbashkëpunimi i Policisë së Shtetit me komisionin përbën jo vetëm vepër penale”, tha Basha.
Ndërsa deputetja Tabaku u shpreh se, Nano deri më tani nuk iu ka kthyer asnjë përgjigje për të dhënat mbi llogaritë bankare të të akuzuarve.
