Forcat e policisë kapën dhe asgjësuan 350 bimë cannabis sativa
Muzafer Mamo, kishte ngritur një serë me ngrohje elektrike për kultivimin e kanabisit. Ai kishte përshtatur një magazinë në Gjirokastër, në të cilën policia tha se kishte kultivuar 350 fidanë marijuane Sera-laborator e tij ngrohej me reflektorë e llampa elektrike. Ai është vënë në pranga nga policia e cila operacionin e kapjes së tij dhe lëndës narkotike e kishte quajtur “Neonët”.
Policia e Gjirokastrës ka shpërndarë këtë njoftim për shtyp: “Si rezultat i këtij operacioni u bë e mundur kapja dhe arrestimi në flagrancë i shtetasit Muzafer Mamo, 56 vjeç, lindur në Lazarat, Gjirokastër.Mamo, në një magazinë të vjetër në pronësi të tij, me sipërfaqe rreth 70 m2 kishte përshtatur një serë me sistem ngrohje me llampa elektrike.Aty u gjetën të kultivuara 350 bimë të dyshuara Cannabis Sattiva.Bimët varionin me lartësi nga 25 cm deri 40 cm.Bimët narkotike u asgjësuan në vend me anë të djegies, ndërsa pajisjet elektrike që shërbenin për ngrohje u sekuestruan në cilësinë e provës materiale së bashku me disa bimë narkotike”.
Materialet do t’i kalojnë Prokurorisë së Rrethit Gjyqësor Gjirokastër për veprën penale “Kultivim të bimëve narkotike”, parashikuar nga neni 284 i Kodit Penal.
