21 vjet pritje për 4-1, Italia e Kontes është larg futbollit që luhet në Bavari
Italianët zbresin me këmbë në tokë. Pas 21 vjetësh, Gjermania gjen për herë të parë fitoren, por 4-1, duke e zvenitur entuziazmin e skuadrës së Kontes, pas barazimit me Spanjën. Miqësorja e Mynihut u dominua totalisht nga kampionët e Botës, ndërsa për trajnerin që sezonin e ardhshëm do të trajnojë Çelsin, tashmë duhet të ketë më shumë dyshime se kurrë. Përpara takimit, Mesut Ozil deklaroi se pas kaq shumë vitesh pritje, Italia do të ketë të njëjtin fat si me Spanjën, por vite më parë, duke pasur parasysh atë humbje 5-0 në finalet e Europianit të shkuar. Dhe në fakt, dje në “Allians Arena” u shënuan pesë gola, por jo të gjitha nga gjermanët. Fillimisht topin në rrjetë e dërgoi Toni Kros, pas një gafe të Bonuçit, ndërsa më pas Gëce e mbylli pjesën e parë 2-0. Në pjesën e dytë, Hektor dhe Ozil me 11-metërsh të fituar nga ndërhyrja e Bufon I mbyllin hesapet e mbrëmjes. Për italianët mendoi El Sharaui, por kur gjithçka kishte përfunduar sportivisht. Si duket Bavaria mbetet akoma vendi i kampionëve.
