Nënkryetari i Partisë demokratike, Agron Gjekmarkaj, shprehet se Basha nuk duhet të dalë nga zyra edhe nëse humb sërish në 6 mars, zgjedhjet e pjesshme lokale. Gjekmarkaj tha se nëse mbështetësit e Berishës do të sfidojnë kandidatët e Bashës në zgjedhjet e pjesshme vendore, me qëllim për t’i kërkuar atij më pas dorëheqjen dhe nuk do të arrijnë asgjë.
Sipas tij, Partia Demokratike vjen nga një proces që, nëse nuk do të masakrohej, do të ishte fituese.
“Ata që nuk mbështesin kandidatët e PD-së, sigurisht i bie që do të mbështesin kandidatët e Edi Ramës, ose të LSI-së. Zoti Basha matet me rezultate politike dhe me zgjedhje politike. Ka frymë dhe ka njerëz, kështu që ne nuk i trembemi asnjë gare elektorale, kurdo që ajo të jetë. Po flisni me nënkryetarin e PD-së dhe ky është një qëndrim” – thotë Gjekmarkaj.
Ai më tej tha se kriza në PD mund të zgjidhet me votën e anëtarësisë, Gjekmarkaj thekson se Berisha nuk përcakton fluksin e votave në selinë blu.
“Sigurisht, Sali Berisha është person i rëndësishëm që ka ndjekësit e tij, por nuk është ai përcaktuesi i fluksit të votave në PD. Je i detyruar të marrësh disa vendime sado që shkaktojnë debat, e të ndjekin nga pas, por duhet t’i marrësh. Nuk mund t’i përkufizosh si të mira, apo të këqija, por logjike” – tha Gjekmarkaj.
