Shefja e Operacionit Ndërkombëtar të Monitorimit: Do jemi të rreptë në zbatimin e kritereve të ligjit
Duket e vendosur drejtuesja e Operacionit Ndërkombëtar të Monitorimit (ONM). Genoveva Ruiz Calavera, ka premtuar se do të shkojë deri në fund procesi i pastrimit të sistemit të drejtësisë nga të korruptuarit. Në një konferencë për mediat, Genoveva Ruiz Calavera, tha se do të jenë gjatë në Shqipëri për ta çuar deri në fund reformën. Ajo premton transparencë përkundrejt të gjithë skeptikëve që dyshojnë se reforma në drejtësi dhe vetting-u në veçanti do të jenë selektivë.
“ONM do kryejë detyrat e saj në mënyrë transparente. Do shqyrtohen kandidaturat për komisionin e Vetting-ut. ONM do të krijojë grup monitorimi afatgjatë. Pra më lejoni që të theksoj qartë që operacioni ndërkombëtar i monitorimit ka rol monitorues, por ai nuk merr vendime ekzekutive. Vetting-u është procesi jetik për t’i hapur dyert Shqipërisë në çeljen e negociatave për anëtarësim. Do jemi të rreptë në zbatimin e kritereve të ligjit. Nëse do ketë rrjedhje informacioni nga punonjësit tanë, ata do largohen menjëherë”, tha Calavera. Ajo lajmëroi se me të mbaruar afati i dorëzimit të aplikimeve te Avokati i Popullit, do fillojmë nga puna për të parë dosjet e secilit kandidat.
