Një i ri nga Maqedonia ka kërcënuar me jetë gazetaren e emisionit “Pa gjurmë” Odeta Dume, pas një mashtrimi të bërë publikisht për rastin e Bleona Matës.
Gazetarja Odeta ka postuar foton e të riut me pistoletë në Instastory ndërsa shkruan se nuk do të ndalet këtu për rastin e Bleona Matës.
“Na ndodh edhe kështu, Mehmet Xheladini nga Maqedonia na dërgon foto dhe na kërcënon. Nuk ndalemi këtu për rastin e Bleona Matës. Reagoi sot edhe policia e Shkupit për këtë kërcënim”, shkruan ndër të tjera Odeta Dume në një postim në Instastory.
Dy ditë më parë i riu, Mehmet Xheladini deklaroi në emision se e kishte takuar Bleonën, vajzën që u zhduk pasditen e 22 majin të vitit 2010, kur ajo ishte vetëm 6 vjeç.
I riu tha se vajza e zhdukur mbahet në Maqedoni dhe kërkoi 300 euro për t’i dërguar te ajo. Por ai ditën e djeshme tregoi se kishte gënjyer dhe gjithë këtë e kishte bërë pasi i duheshin para.
