Analisti Frrok Çupi ditën e djeshme ka komentuar sjelljen e ish-kryeministrit Sali Berisha drejt Shteteve të Bashkuara të Amerikës.
Çupi u shpreh se Berisha ka qenë koherent me nisjen e “Foltores”, sulmeve ndaj amerikanëve dhe reformës në drejtësi.
Sipas analistit, është qesharake mënyra sesi e ka katandisur veten Berisha duke sulmuar SHBA teksa shtoi se drejtësia do të veprojë. “Berisha ka qenë koherent në sulmet e tij edhe me gjithë atë përsheshin e çorganizimin e foltores, valë ka ngritur akuza ndaj SHBA dhe reformës në drejtësi. Berisha është në orët e fundit. Berisha duhet të kuptojë tre momentet e fundit, të cilat janë: Berisha të kuptojë më në fund se ku e ka katandisur veten, të dalë rrugëve dhe të sulmojë SHBA është vërtet qesharake. Ti thërrasë mendjes dhe të thotë sa keq i kam bërë këtij populli. Vjen një moment që mjaft është mjaft. Duhet të veprojë drejtësia dhe do të veprojë”, u shpreh ai.
Analisti tha se drejtësia nuk ka vepruar ende pasi duhet të garantojë provat. Çupi u shpreh se drejtësia aktualisht është duke hezituar për të vepruar çka shton më shumë vonesa. Sipas tij, nëse drejtësia vonohet më shumë ndodh humbja e besimit te sistemi i saj si dhe krimi guxon më shumë për të qenë në krye të shtetit. “Fakti që drejtësia nuk vepron do të thotë që organet e drejtësisë janë ende të dobëta dhe po tentojnë të kenë garanci. Drejtësia duhet të thotë vetë se s’ka prova, duhet ta provojë, ta thërrasë. Mendoj se është e ngadaltë, e dobët, e frikësuar.
Kemi një histori 30-vjeçare ku drejtësia ka qenë nën sofër, e trembur, e shtypur dhe ka thithur para nga politikanët. Sot jemi në momente kur përsëri drejtësia po heziton dhe nëse do vonohet më shumë do kemi, dy momente: humbjen e besimit ndaj organeve të reja të drejtësisë dhe guximin e krimit për të hipur sërish në krye të shtetit”, tha Çupi.
