Një histori përmes fotografive, nga plagosja e Azem Hajdarit tek kërcimi i Ilir Metës mbi foltore drejt e në tavolinën e kryetares së Kuvendit.
E shihni këtë burrë që si zemërluan është sulur drejt podiumit të ministrave e të kryetares së Kuvendit. Është Ilir Meta, tetë vjet më parë, kur Berisha dhe Rama po miratonin me konsensus reformën zgjedhore, e cila penalizonte LSI-në. Është një ndër ngjarjet e dhunshme në këtë foltore. Sot, Ilir Meta është ulur në poltronin e kryetarit të Kuvendit dhe prej andej bën thirrje për qetësi e dashuri, kur grinden Rama e Berisha. Me siguri e ka harruar atë kohë, kur i duhej të dilte shpesh në atë foltore për t’u përballur herë me njërin e herë me tjetrin, në rastet kur i kishte kundërshtarë.
Në këtë foltore kanë ndodhur shumë ngjarje. Është vendi ku villet vrer, ku shahet e fyhet, ku rrihen me grushta e ku kanë ndodhur dhe plagosje. Deputetë, ministra e kryeministra lëshuar akuza të frikshme e nuk kanë lënë gjë pa i thënë njëri-tjetrit edhe për familjarët e tyre.
Padyshim që një ndër ngjarjet më të frikshme të ndodhura në atë foltore është plagosja e themeluesit të PD-së, ish-deputetit të kësaj partie, Azem Hajdari. Ka ndodhur në vitin 1997, ku pas një debati të ashpër me deputetin e PS-së, Gafur Mazreku, ky i fundit e qëlloi me armë.
Më pas të tjera sherre të rënda kanë ndodhur në atë foltore, vendi që dëshmon një histori të frikshme të një fjalori të shthurur. Një histori e shkurtër e shrrnajave vjen përmes fotografive të publikuara nga regjizori Saimir Kumbaro.
