Ministrja e Mbrojtjes, Mimi Kodheli, tha sot se autoritetet shqiptare kanë marrë të gjitha masat për sigurinë e vendit, në rast fluksi të refugjatëve sirianë. Gjatë raportimit në Komisionin e Sigurisë Kombëtare, Kodheli tha se në rast fluksi të emigrantëve sirianë, Shqipëria nuk do të jetë stacion ndalimi, por vetëm tranzit dhe autoritetet kanë marrë të gjitha masat për të përballuar situatën.
Kodheli tha se ka një numër të madh keqbërësish të cilët duan të përfitojnë nga kriza e refugjatëve dhe për të shmangur çdo rrezik, ka komunikim të vazhdueshëm me shërbimet inteligjente të rajonit.
“Ata thjesht dhe vetëm do ta përdorin Shqipërinë tranzit për të shkuar diku tjetër. Ne kemi punuar prej shumë kohësh dhe do të vazhdojmë të punojmë, të mbetemi në kontakt lidhur me të gjitha informacionet që vinë nga agjencitë e inteligjencës në mënyrë që të kuptohen lëvizjet e kujtdo, pavarësisht se ju siguroj se kjo është një punë voluminoze dhe e vështirë e kujdo që mundet nëpërmjet refugjatëve të hyjë si keqbërës”, tha Kodheli.
