Shpëtim Idrizi, kryetar i PDIU-së, ka reaguar për opinion.al lidhur mbi vendimin e fundit të Partisë Demokratike dhe LSI-së për djegien e mandateve dhe si do të veprojnë tre deputetë e dalë nga radhët e PDIU-së.
Idrizi është shprehur se vendimi i PDIU do të jetë në koherencë me opozitën e bashkuar, pasi ky formacion politik sipas tij është pjesë e opozitës që nga data 7 shtator.
Lidhur mbi deputetët, Idrizi tha që nuk mban asnjë përgjegjësi për vendimin e tyre pasi ata nuk janë më deputetë të PDIU dhe tani votojnë për Partinë Socialiste.
“Nuk vihet në diskutim që ne jemi në unison me vendimin e opozitës për djegien e mandateve. Ne e kemi bërë deklaratën tonë direkt pas Bashës. Nëse e keni për ata 3 deputetë në Kuvend, ata s’janë të PDIU-së, ata janë regjistruar si të pavarur dhe votojnë Partinë Socialiste…, domethënë ata s’kanë qenë kurrë të PDIU-së. PDIU ka që më 7 shtator që është pjesë e opozitës së bashkuar.”, tha Idrizi për opinion.al
