Kanë përfunduar ndeshjet e javës së 34-t në Abissnet Superiore, të zhvilluara të gjitha në të njëjtin orar, ku vëmendjen kryesore e morën ekipet që luftojnë për mbijetesë.
Një nga rezultatet më të spikatura ishte fitorja bindëse e Flamurtarit, që triumfoi 1-4 në transfertë ndaj Partizanit në “Arenën e Demave”. Vlonjatët u udhëhoqën nga një paraqitje e fortë, me dy gola të Bolzan dhe realizime nga Divara dhe Erald Maksuti. Për Partizanin, golin e vetëm e shënoi Altin Bytyçi me një goditje nga distanca.
Në një përballje tjetër të luftuar, Vora mposhti Elbasanin me rezultatin 3-2. Daka hapi serinë e golave në pjesën e parë, ndërsa Luiz Felipe dhe Bernard Karrica vulosën fitoren në fraksionin e dytë. Për Elbasanin realizuan Boje dhe Bunjaku.
Dinamo arriti një fitore të pastër 2-0 ndaj Egnatias në stadiumin “Air Albania”, falë dopietës së Malomo Ayodejit, duke konsoliduar pozitat në renditje.
Ndërkohë, Tirana e drejtuar nga Orges Shehi siguroi një sukses të rëndësishëm në transfertë, duke mposhtur Teutën 0-1 në “Niko Dovana”. Golin vendimtar e realizoi Rimal Haxhiu në pjesën e dytë.
Në sfidën tjetër, Vllaznia u mposht në shtëpi nga Bylis me rezultatin 0-2, duke humbur terren në renditje.
