Rajonet e së ardhmes, gazeta e njohur liston qytetet më të mira të Ballkanit
Tirana nuk është një destinacion tërheqës për investitorët e huaj. Kjo konfirmohet edhe në listimin që ka bërë gazeta e njohur Financial Times, ku jepen të renditura “Qytetet dhe rajonet e të ardhmes, 2016”, listë në të cilën përfshihen kryeqytete e qytete të Maqedonisë, Serbisë, Kroacisë e Bosnjës. Nuk është më surprizë që për të dytin vit radhazi, Shkupi është i pari në listën e 10 qyteteve të vogla europiane të të ardhmes 2016/2017.
Po ashtu kryeqyteti maqedon është i gjashti dhe në listën e qyteteve të vogla europiane për nga stategjia e investimeve të huaja direkte. Pjesë e listës është edhe Beogradi, i teti mes 10 qyteteve të mëdha europiane për nga eficienca e kostos, për të vijuar me Zagrebin dhe Sarajevën. Ndërkohë për tregues të tjerë ka edhe qytete të tjera të dorës së dytë si nga Serbia, Kroacia dhe Bosnja.
Përjashtim bën vetëm vendi ynë. Kjo për faktin se Shqipëria edhe pse është konkurruese në pagë dhe në qira, e ka të humbur betejën sa i takon çmimit të karburanteve (më i larti në rajon) si edhe nivelit të lartë të taksave. Me një normë fiskale 36.5 për qind përsëri prijmë në rajon për nga niveli i lartë.
Për të realizuar renditen e investimeve të huaja direke, Financial Times mbledh të dhëna nga 481 zona në shtetet europiane (294 qytete, 148 rajone dhe 39 kompani partnere lokale) në pesë kategori: potenciali ekonomik, mjedisi i punës, eficienca e kostos, infrastruktura dhe klima e favorshme e biznesit.
