Ka përfunduar mbledhja e kreut të Partisë Socialiste Edi Rama me drejtuesit politikë të PS-së në qarkun Shkodër.
Në një deklaratë për mediat, ish-ministri i Jashtëm Ditmir Bushati theksoi se fenomeni i Valdrin Pjetrit duhet të çrrënjoset dhe të gjitha subjektet politike duhet t’u japin qytetarëve të saj emrat më të mirë.
“Ne morëm një vendim kohë më parë, duke i ndërprerë mandatin personave që në të shkuarën kishin probleme me ligjin. Morëm mbështetjen dhe përshëndetjet nga SHBA, ndërsa tani në tryezat tona kemi të njëjtat probleme”, u shpreh Bushati.
Sipas tij, PS është një familje e madhe që bashkë me partitë e tjera suhet të reformohen brenda tyre, për ti dhënë zgjidhje njëherë e mirë problemeve me dekriminalizimin.
“Ne nuk jemi prokurori dhe as gjyqtarë, por kemi përgjegjësinë tonë për vendimmarrjet e gabuara”, tha Bushati.
Ndërkohë edhe Sekretari i Përgjitshëm i Partisë Socialiste, Taulant Balla referuar rastit të Valdrin Pjetrit ka ritheksuar qëndrimin e kryeministrit Edi Rama për forcimin e ligjit për zyrtarët që gënjejnë në formularin e dekriminalizimit.
“Kishim një mbledhje kryesie të Partisë e cila ishte tërësisht e fokusuar për sa i përket një prezantimi dhe një axhendë pune intensive që lidhet me një ripërtëritje të regjistrit të anëtarësisë. Siç e dini PS- është e vetmja forcë në vend që është në proces të vazhdueshëm ristrukturimi, ne kemi argumentuar nevojën që në strukturën e PS në Bashkinë Shkodër, të ndërmarrim një hap të rëndësishëm rigjenerimi, do të ndodhë në të gjitha Bashkitë por me fokus të veçantë Shkodrën. Kemi marrë këtë vendim për të qenë shumë të angazhuar dhe për ta ndjekur procesin e riformatimit të PS-së në Shkodër, ku do të ndërtojmë një model konkurrues dhe siç i ka hije Shkodrës zonjë.
Unë nuk e di çfarë ka thënë Bushati, sigurisht brenda PS-së kemi gjithmonë diskutime për çështje të caktuara, lidhur me rastin e Valdrin Pjetrit që u votua nga populli i Shkodrës, por për shkak të një përgjegjësie personale nuk u betua për të qenë Kryetari i Bashkisë së Shkodrës, për shkak të provave për ligjin e dekriminalizimit, kjo është një përgjegjësi tërësisht personale. Kryeministri ka shprehur domosdoshmërinë që këtë përgjegjësi personale ne ta ashpërsojmë përmes mekanizmave ligjorë dhe të ndëshkohen edhe më fort.
PS do të vazhdojë të jetë forca e reformimit të motorëve të brendshëm të saj. I kemi kërkuar popullit të Shkodrës ndjesë për këtë kandidaturë, por përgjegjësia është personale. Në çdo rast PS ka vënë një standart.”- u shpreh Balla.
