Familja e këngëtarit Dr. Flori, i cili vdiq rreth dy vite më parë nga nje mbidozë kokaine, ka përfituar nga qeveria një pension të veçantë të premtuar direkt nga kryeministri Edi Rama. Ndihma prej 50 mijë lekësh në muaj u bë realitet me një vendim të Këshillit të Ministrave dhe do të hyjë menjëherë në fletoren zyrtare.
Disa muaj më parë në programin “6 ditë pa Ermalin”, Edi Rama, premtoi pas kërkesës së Ermal Mamaqit, një ndihmë ekonomike për familjen e këngëtarit të ndjerë, Dr. Flori.
Ndihma nga Mamaqi u kërkua veçanërisht për të plotësuar nevojat e veçanta të djalit të vogël të Dr. Florit dhe bashkëshortes së tij Blerinës, i cili është me sindromën down.
Rama në fillimet e karrierës së tij politike realizoi dhe një këngë me grupin në të cilin këndonte këngëtari West Side Family, ndërsa më vonë këngëtari bëri një këngë kundër Ramës me titullin “Zemërthyer”. Mesa duket kryeministri ka dashur të tregojë se nuk është qejfmbetur ndaj tij.
Në rrjetet sociale ka patur mjaft kritika ndaj këtij vendimi, duke shkruar se qeveria nuk ka të njëtën ndjeshmëri për fëmijët e sëmurë, apo fëmijët e tjerë jetimë, siç ishte rasti i Kristi Mazes apo duke kujtuar familje të varfëra, ku një prej prindërve mund të ketë vdekur në punë.
