Të gjithë ata që kanë deklaruar me vonesë deklaratat e sigurimeve, tatimit mbi vlerën e shtuar, të pasqyrave financiare apo destinimit të fitimit mund të përfitojnë nga drafti i fundit i faljes fiskale, i cili parashikon fshirjen e gjobave prej 10 mijë lekë për deklaratë, që vë automatikisht sistemi, në rast vonese, apo mosdeklarimi të tyre. Falen edhe gjobat e listapagesave qe ka vendosur sistemi.
Por bizneset duhet të nxitojnë të bëjnë të gjitha deklarimet e padorëzuara deri në fund të qershorit të këtij viti.
Sipas draftit të hartuar nga Ministria e Financave, janë gjithashtu objekt i fshirjes sipas këtij ligji, detyrimet tatimore të mëposhtme, pavarësisht periudhës tatimore që i përkasin:
-dënimet administrative (gjobat) për dorëzim të vonuar të vendimit për destinimin e rezultatit dhe dorëzim me vonesë të pasqyrave financiare të aplikuara sipas Ligjit “Për tatimin mbi të ardhurat”, i ndryshuar, te llogaritura deri në datën 31.12.2016 .
– dënimet administrative (gjobat) për mosdeklarim në afat, për deklarata të padorëzuara, me kusht që çdo deklaratë e padorëzuar të dorëzohet deri në datën 30.06.2017.
Drafti ka zgjidhur edhe problemin e gjobave masive që u vunë nga sistemi për deklarime të vonuara të administratorëve dhe të punësuarve në qershor 2016. ‘Falen dënimet administrative (gjobat) tatimore të llogaritura automatikisht nga sistemi për deklarim të vonuar sipas nenit 113 të Ligjit Nr. 9920, datë 19.08.2008 “Për proçedurat tatimore në Republikën e Shqipërise”, i ndryshuar, deri më 31.12.2016, përfshirë edhe dënimet që lidhen me afatin e deklarimit të të punësuarve”, thuhet në draft.
Të gjitha ata që morën supergjoba në dhjetor të vitit 2015, për aq kohë sa u zbatuan ndryshimet në ligjin e procedurave, do të përfitojnë gjithashtu nga falja. Sipas draftit, falen “dënimet administrative (gjobat) si rezultat i aplikimit të dispozitave të ligjit nr.99/2015 “Për disa shtesa dhe ndryshime ne ligjin për procedurat tatimore në RSh”, të shfuqizuara nga Gjykata Kushtetuese”.
Pastrohen regjistrat nga subjektet e çregjistruar
Drafti parashikon edhe fshitjen e detyrimeve tatimore (pavarësisht periudhës tatimore që i përkasin) përfshirë tatimin/kontributin/taksën, kamatëvonesën dhe dënimet administrative për subjektet persona fizikë ose juridike, të cilët rezultojnë të çregjistruar në QKB, me vendim gjykate, ose që janë të çregjistruar në administratën tatimore deri në datën e hyrjes në fuqi të këtij ligji. Sipas burimeve nga tatimet, ky nen synon të pastrojë regjistrat nga situata të tilla si psh subjekte të çregjistruara në tatime , QKB, apo vendim gjykate, por që rezultojnë me detyrime. Psh një rast i tillë mund të jetë, nëse subjekti çregjistrohet ne QKB (ka kaluar afati dhe administrata tatimore nuk ka dhënë asnjë përgjigje) por ndërkohë në tatime ka detyrime.
/monitor.al/
