Euro është zhvlerësuar sërish në tregun vendas, duke humbur 0.65 pikë krahasuar me një ditë më parë. Një euro është këmbyer sot në nivelin e 129.35 lekë. Sot ka qenë dita e pestë radhazi ku monedha e përbashkët është nënçmuar ndaj lekut vendas.
Kjo sipas ekspertëve në tregun e këmbimit valutor reflekton tendencën në rënës të euros në tregun e brendshëm. Sipas tyre zhvlerësimi i euros po ndikohet kryesisht për shkak të masave nxitëse për përdorimin e monedhës kombëtare nga Banka e Shqipërisë, si dhe të deklaratave për procesin e deeuroizimit.
Megjithatë sipas aktorëve të tregut të këmbimit, në zhvlerësimin e euros më shumë po ndikon faktori psikologjik. Për shkak të nënçmimit të monedhës së përbashkët europiane, ka një orientim të individëve drejt kursimeve në lekë. Këtë e tregojnë edhe të dhënat e publikuara nga Banka e Shqipërisë stoku i depozitave në valutë kishte rënë me 47 milionë euro. Kjo është rënia më e madhe mujore që prej majit të vitit 2014.
Arsye tjetër e zhvlerësimit të monedhës këto ditë janë edhe ditët e pushimit, të cilët individët i shfrytëzojnë për të lëvizur jashtë Tirane për pushime, por edhe fluksi i emigrantëve, të cilët pritet ta shtojnë ofertën në valutë.
Në dy vitet e fundit euro ka qenë e dobët përkundrejt valutës vendase.
Ekspertët shpjegojnë se euro vijon të mbetet e dobët në tregun e brendshëm si rrjedhojë e ofertës së lartë, e cila vjen nga kanalet informale, konvertimet e bizneseve për të paguar taksat, transaksionet e shtuara në tregun e pasurive të paluajtshme, ku blerjet kryhen me euro dhe më pas ndërtuesit e konvertojnë në lekë, orientimin e disa transaksioneve drejt lekut, duke shtuar ofertën në valutë, konvertimet e atyre që kanë euro në shtëpi, që nxituan t’i kthejnë në lekë nga frika se mos monedha e përbashkët binte më tej, orientimin e investimeve drejt lekut, që nënkupton konvertimin e eurove etj.
Rënie kanë pësuar edhe monedhat e tjera, përveç Koronës norvegjeze. Dollari amerikan është nënçmuar 0.46 pikë, duke u këmbyer në nivelin e 105.35 lekëve.
