Nga Enkel Demi
Kërkoj ndjesë, nëse cënoj dikë në Mallkastër, por ma kishte ënda ta përdorja për titull këtë shprehje të kohëve të vjetra, kur mësova fushimin e ministrit të Mbrojtjes së Greqisë në kufi me Shqipërinë.
Bëj mundim të madh të kuptoj se si një politikan që udhëheq Ministrinë e Mbrojtjes shkon në zbor, madje vishet ushtarak pa qenë i tillë. Për hir të kronikës duhet thënë që Panos Kamenos ka studiuar për ekonomi agrare në Lion të Francës.
Është më shumë se qesharake që një anëtar i kabinetit i një vendi anëtar të NATO-s zgjedh këtë mënyrë propagande. Të fundit që kam parë në Ballkan të krekosur me uniforma ushtarake kanë qenë politikanët e Serbisë, tek kryenin takimet përgëzuese pas masakrave në Srebrenicë apo Raçak. Por, të njëjtët i kam parë edhe me tesha burgu në Hagë.
Panos Kamenos ka marrë pjesë në një stërvitje ushtarake në kufi me Shqipërinë dhe që andej i veshur si gjeneral në luftë ka kërcënuar qeverinë e Shqipërisë dhe kreun e saj. Pastaj duke menduar “jam që jam i mbathur me kambale” i është gafurur edhe Turqisë.
Në fakt, është e panevojshme të analizosh deklaratat e tij kërcënuese, sepse janë për konsum të brendshëm politik. Panos Kamenos përfaqëson një parti të ekstremit të djathtë, i cili dy herë rresht pranoi të merrte pjesë në qeverinë e ekstremit të majtë. Është e natyrshme që tani, kur barka e Cipras fut ujë kudo, Kamenos të bëjë llogaritë e veta. Si udhëheqës politik ekstremist ai ka vënë re që ka humbur mjaft elektorat dhe rrezikon ndoshta pjesmarrjen në Kuvendin e Greqisë në zgjedhjet e ardhshme, ku është e qartë humbja e SYRIZA, por edhe tij si aleat i komunistëve.
Ndaj një gomë shpëtimi mund të jetë nacionalizmi, vendosja në pozitat e kërcënuesit, i cili është gati të ndezë zjarrin në Ballkan dhe jo vetëm në veri me Shqipërinë, por edhe gjetkë me Turqinë. Nuk e kam informatën e duhur, nëse kjo do të ngjisë tek votuesit vendas, por tek të kërcënuarit është e sigurtë që është pritur si qyfyre.
Mendoni që si kundërpërgjigje ministrja jonë e Mbrotjes, Mimi Kodheli të vishej si gjeneral brigade Manushaqe Shehu dhe të kërcënonte Ciprasin duke ngrënë gështenja rreth zjarrit të fushimit. Nuk do të kishte mbetur program komik, politik dhe kolumnist pa u marrë me të. Falë Zotit, në Shqipëri kjo lloj marrie nuk ka ndodhur kurrë. Edhe Pandi Majko, i cili kur ishte i vogël donte të bëhej pilot, nuk u vesh ushtarak gjatë konfliktit të Kosovës, kur tek e fundit i shkonte.
Nejse, duhet mbajtur shënim që Pano kërcënon dhe mirë në Tiranë, por andej nga Ankaraja duhet të jenë futur në brimë të miut nga llahtara.
