Erozioni dhe reshjet e shiut e dëborës gjatë muajve të dimrit kanë dëmtuar muret rrethuese në Kalanë e Beratit, ndërsa kanë shkaktuar rrëshqitje në kalanë e Gjirokastrës.
Mungesa e investimeve mirëmbajtëse ndër vite ka bërë që muret brenda kalasë shekullore të Beratit të dëmtohen e shemben kryesisht gjatë muajve me reshje.
Problematika nuk qëndron vetëm në dëmtimet që shkaktohet në pjesën më të vizituar të qytetit, siç është kalaja, por dhe në rrezikshmërinë që rënia e tyre mund të shkaktojë tek banorët apo vizitorët.
Ndaj Drejtoria Rajonale të Kulturës Kombëtare në Berat ka paralajmëruar nisjen në shkurt të fazës së dytë të ndërhyrjes për rikonstruksion.
“Ka pasur nga reshjet disa dëmtime dhe rrëzime të këtyre mureve, pasi shumë prej tyre janë me baltë”
Ndërkohë erozioni ka shkaktuar dëmtimin e një prej segmenteve dytësore poshtë kalasë Argjiro në Gjirokastër.
Në bashkinë e Gjirokastrës thonë se ndërhyrja do të jetë e shpejtë, pasi rruga ndodhet në zemër të zonës muzeale.
