Sopranoja me famë botërore, Ermonela Jaho do të interpretojë rolin e Desdemonës në operën “Otello” të Xhuzepe Verdit, që do të vihet në skenë në Teatrin Real në Madrid të Spanjës në 15 shtator.
Opera do të çelë sezonin e ri artistik të këtij teatri, ku roli kryesor do të vijë nën interpretimin e shqiptares Ermonela Jaho dhe Gregory Kunde si Otello.
Sopranoja shqiptare sjell me këtë shfaqje Verdin, një vepër të të cilit Teatri Real, nuk e ka vënë në skenë qysh nga nëntori i vitit 1999.
Mediat spanjolle e quajnë sopranon një artiste në rritje, e cila po shkëlqen në skena botërore, e fuqishme për role si ky i Desdemonës, pas debutimit të saj këtë verë krah Plaçido Domingos. Sopranoja do të ngjitet në skenën e Teatrit Real në datat 18, 21, 27 dhe 30 shtator, si dhe në natën e fundit në 3 tetor.
Sopranoja, Ermonela Jaho, ka interpretuar dhe vazhdon të shënojë në kalendarin e saj artistik skenat më të njohura operistike si Opera Mbretërore e Londrës, Teatri i Scala-s të Milanos, Opera Metropolitan e Nju Jork-ut, Teatri i Champs-Elysees.
Në maj të këtij viti sopranoja shqiptare, Ermonela Jaho ka fituar çmimin ndërkombëtar prestigjoz Readers Award në ceremoninë që njihet si Oskari i Operas që u mbaj në teatrin “Savoy” të Londrës. Sopranoja me famë botërore triumfoi mes shumë zërave të tjerë operistikë nga mbarë bota, duke u vlerësuar maksimalisht nga votat e publikut ndërkombëtar.
Pak ditë më parë, Jaho performoi edhe në koncertin e madh në Romë në nder të shenjtërimit të Nënës Terezës.
/ata.gov.al/
