Ministrja e Shëndetësisë dhe Mbrojtjes Sociale Ogerta Manastirliu gjatë vizitës në Moravë të komunës Otllak në Berat, tha se në kuadër të masave për parandalimin dhe eliminimin e epidemisë së fruthit po kryejmë në territor vaksinimin e fëmijëve dhe popullatës së riskuar.
Në të gjithë vendin janë 163 raste me fruth, ndërsa dy fëmijë ndërruan jetë në fund të janarit dhe fillim të shkurtit.
Sipas Manastirliut, deri tani janë kryer rreth 10 mijë vaksina kundër fruthit që prej muajit Janar, jashtë procesit rutinë të vaksinimit, ndërsa janë në dispozicion 140 mijë doza vaksine kundër fruthit. Me programin e kujdesit shëndetësor në komunitetit, u krye në Moravë vaksinimi i 120 fëmijëve dhe të rriturve të komunitetit rom dhe egjiptian.
Pjesë e këtij programi kombëtar është edhe ofrimi i shërbimit të mamografisë së lëvizshme pranë komunitetit. U realizuan 30 mamografi për gratë në moshë risku të komunitetit rom në këtë zonë.
Manastirliu u ndal dhe në Urën Vajgurore, në qendrën shëndetësore Goriçan, e cila këtë vit do ti nënshtrohet rehabilitimit të plotë për 2400 banorët e kësaj zone, në kuadër të programit të rikonstruksionit të 80 qendrave shëndetësore gjatë këtij viti.
