I riu i cili u gjet i djegur në një makinë mbrëmjen e djeshme në Kërrabë Armand Mici rezulton si person i pastër me drejtësinë, thënë ndryshe i paprecedentë. Sipas policisë, Mici nuk ka qenë shoqëruar asnjëherë në komisariatin e policisë dhe ishte një biznesmen në fushën e tregtimit të automjeteve.
Referuar dinamikës së ngjarjes por edhe hetimeve nga policia, kushtet e depresionit janë indicia kryesore që dyshohet se ka çuar 32- vjeçarin të kryejë vetëvrasje.
Sakaq, pritet që familjarët të merren në pyetje për të zbardhur detaje mbi këtë akt të rëndë që i riu dyshohet të ketë marrë.
Kujtojmë se ngjarja e rëndë ndodhi mbrëmë rreth orës 22:30, në rrugën e vjetër Elbasan – Kërrabë. Trupi i 32-vjeçarit nga Elbasani u gjet brenda një makine totalisht të shkrumbuar.
Mici rezulton se ka blerë një sasi benzinë në një karburant dhe në kushtet e depresionit, është vetëdjegur brenda makinës së tij tip “Volkswagen Passat” me targa AA 273 NU. Nga ana e grupit hetimor vazhdon kryerja e veprimeve të mëtejshme për sqarimin e çdo rrethane që mund t’i shërbejë hetimit, ndërkohë që nuk përjashtohen as pistat e tjera.
