Nesër El Clasico dhe e gjithë bota e futbollit e ka kthyer vëmendjen nga Barcelona, megjithëse skuadra e Luis Enrikes është 10 pikë përpara Realit të Madridit. Ndërsa në gjoksin e futbollistëve katalanas nuk do të jetë logo e kampionëve të botës, por mbishkrimi “Gracies Johan!”, një nga iniciativat e shumta në nderim të Krujf, i ndarë nga jeta tetë ditë më parë. Dhe holandezi e meriton një logo të tijën, qoftë edhe për një ditë, pasi është legjenda që ndërroi përgjithmonë historinë e klubit “blaugrana”. Ndërkohë që janë të shumtë ata që do të bëhen pjesë e këtij spektakli. Deri tani janë akredituar 700 gazetarë, të cilët do të përçojnë nënën e të gjitha ndeshjeve në 184 vende të ndryshme. Do të ketë komentatorë të jashtëzakonshëm, midis të cilëve Erik Abidal, Rud Gulit, Fabio Kapelo, Huan Pablo Sorin, apo Patrik M’Boma. E veçantë është që do të jenë sërish përballë njëri-tjetrit në një “klasike” Luis Enrike dhe Zinedin Zidan. Për herë të fundit, një gjë e tillë ka ndodhur përpara 10 vitesh, kur të dy luanin në fushë.
Ndeshja do të luhet në “Camp Nou”, ku Barcelona nuk ka humbur për më shumë se një vit (për herë të fundit ka ndodhur më 21 shkurt 2015 kundër Malagas). Më pas, në 22 takime të luajtura në shtëpi, kampionët e Europës kanë arritur 20 fitore dhe 2 barazime. Fitorja e fundit e Realit në “Camp Nou” ka ndodhur në vitin 2013 (1-3), kur “los blanchos” drejtoheshin nga Hoze Murinjo. Dhe në fund, sfida e golit do të ndahet midis Leo Mesit dhe Kristiano Ronaldos, madje për këtë, kompanitë kanë vendosur baste të veçanta. Që argjentinasi shënon më shumë është kuotuar 2.10, ndërsa që garën e fiton CR7 kuota është shumë më e lartë, 4.00. Në fushë do të jenë dy skuadra që kanë shënuar 173 gola në këtë kampionat (87 Real, 86 Barça) dhe kështu që koeficienti për gola lart (3+) është jashtëzakonisht i ulët për një derbi, vetëm 1.30.
