Pas ekzekutimit të Bledar Muçës në Belgjikë, autoritetet belge kanë nisur hetimet për të zbuluar më shumë detaje që lidhet me veprimtaritë e tij kriminale si dhe lidhjet që ka pasur ai me rrjete krimi. Në këtë kuadër, bëhet me dije se autoritetet belge i kanë dërguar informacion drejtorisë së Përgjithshme të Policisë për veprimtarinë e Muçës, në shkresën e së cilës janë rreshtuar problemet në të cilat viktima mund të jetë i përfshirë në Shqipëri apo në shtete të tjera.
Drejtoria e Përgjithshme pritet që t’i dërgojë Drejtorisë së Elbasanit një sërë porosish për të vijuar më pas edhe hetimet në vendin tonë në lidhje më vrasjen në Belgjike. Deri më tani policia e Elbasanit po verifikon disa persona me të cilët ndër vite Bledar Muça ka pasur probleme.
Shqiptarit iu janë gjetur dy karta identiteti, një bullgare dhe një britanike, ç’ka ka zgjatur dhe vështirësuar për disa orë punën e autoriteteve për identifikimin e Muçës. Kanë qenë shenjat e gishtërinjve që kanë bërë të mundur identifikimin e mikut të afërm të Çapjave të Elbasanit si dhe kombësinë e tij.
