Sekretari i Përgjithshëm i PLS-së, Tedi Blushi ka reaguar për vrasjen e 19- vjeçarit Erjon Xhenjes në Shkodër. Blushi u shpreh se Shkodra ndodhet nën pushtetin e krimit.
“Shkodra nën terrorin dhe pushtetin e krimit dhe të bandave me mbështetje qeveritare! Siguria e qytetarëve dhe e bizneseve në Shkodër është tronditur më rëndë se kurrë. Kryeqendra e Veriut, ndodhet nën pushtetin e krimit për shkak të mbështetjes së hapur të Qeverisë për bandat më të rrezikshme lokale, të mbrojtura dhe të vëna në shërbim të saj”, shkruan Blushi.
Blushi publikon numrin e personave të ekzekutuar në 9 muajt e parë të vitit 2022, duke u shprehur se Policia e shtetit nuk po bën asnjë përpjekje për t’i zbardhur ato.
“Vetëm në 9 muajt të parë të vitit 2022 në Shkodër janë ekzekutuar 6 persona. Të gjitha vrasje mafioze të pazbardhura nga Policia e Shtetit dhe ende pa autor. Çdo qytetar në Shkodër i di shumë qartë motivet e krimeve, edhe Policia e Shtetit i di, por nuk bën asnjë përpjekje për të zbardhur vrasjet, arrestuar dhe nxjerrë para drejtësisë autorët, sepse direktiva që ka marrë nga Edi Rama dhe Bledi Çuçi është e qartë: “Hëngshin kokat e njëri-tjetrit. Pa krim nuk ka zhvillim”, shkruan Blushi.
Ndër të tjera Sekretari i Përgjithshëm i Partisë së Lirisë i bën thirrje Policisë së Shtetit për të marrë masa për sigurinë e qytetarëve.
“Duke dënuar me ashpërsinë më të madhe lënien e Shkodrës nën sundimin e bandave të lidhura me pushtetin, i bëjmë thirrje Policisë së Shtetit, në zbatim të ligjit dhe të Kushtetutës, të nisë pa vonesë rivendosjen e rendit publik dhe sigurisë së jetës në këtë qytet simbol të qytetarisë, dijes, arsimit dhe kulturës. Shqiptarët meritojnë një Qeveri dhe Polici të Shtetit që lufton me zero kompromis krimin e organizuar në çdo qelizë të saj. Partia e Lirisë garanton çdo qytetar shqiptar se që në ditën e saj të parë në pushtet do të nisë me vendosmëri të hekurt betejën për të çmontuar dhe shtypur me të gjithë forcën e ligjit bandat kriminale të Edi Ramës në çdo qytet të Shqipërisë”,- shkroi Blushi.
